لكل حدا فينا لازم يكون في زاوية صغيرة بحياتو خاصة فيه ،، بيبكي فيها و بيفرح فيها و بيدرس فيها و بيسمع موسيقى فيها و بيشتغل فيها ، تماماً متل الحضن ،، منلجأ لهالزاوية بكل حالاتنا و منسجل فيها أحلى لحظاتنا و منعلقها على جدرانها ، بهي الزاوية بصنع الي الهامي الخاص ،، رتبتها تماماً متل مو مرتبة روحي ،، كلها ألوان و بهجة تماما متل ما في ألوان كتيرة بقلبي ،. رغم الكسر بعرف لاقي الي مساحة صغيرة لاهرب ، لاتجرد من باقي الأماكن يلي ما بتشبهني ،، هي الزاوية بتشبهني كتير ،، انتوا كمان لازم يكون عندكن زوايا بتشبهكن لتلاقوا فيها حالكم وقت تضيعوه ،، مو شرط زاوية كبيرة ولا مزخرفة و لا فخمة ،، المهم تكون انعكاس لروحكم 
تعليقات
إرسال تعليق