عندك حلم و بدك توصله صح ؟! أو يمكن هدف أو مشروع أو قناة على اليوتيوب بدك توصلها للملايين !!
بس ماعم تلاقي الوقت الكافي أو ما عم تعرف تنظم وقتك بشكل مثالي 😔 نهارك عم يضيع سواء مع الأولاد أو بالشغل أو بالالتزامات العائلية !! 😕
.
.
طيب بسيطة 🥰 رح شارك معكم بهالبوست خمس أسرار مهمة لتنظيم الوقت 🤫 أنا بستخدمهم دايما و بتنجح الخطة 🤓 و كتير انسألت عليهم
.
.
أولاً : بدك تشيل من راسك فكرة " ماعندي وقت أو الوقت ما بكفي "🌚 لأنو طول ما انت مبرمج نفسك على هي الفكرة صدقني ولا الف شخص بيقدر يساعدك حتى لو أعطوك خمسين ساعة باليوم زيادة الك عن ال اربع وعشرين ساعة يلي عند البشرية 🤦🏻♀️ في وقت لكن انا ماعم اعرف استثمره ..
.
.
ثانياً : بدك ورقة و قلم تكتب فيها تلت شغلات بسيطة جدا : أولوياتي - أهدافي - ثانوياتي
الاوليات متل الطبخ و الاولاد و المهمات يلي كتيييير حساسة و يلي بدونها ممكن يخرب ميزان البيت تبعك يعني الضروري جدا
الاهداف هي الشغلات يلي انت عم تسعى لتحقيقها يعني يلي انت بدك وقت منشانها سواء دراسة او قناة على اليوتيوب او تصوير او ممارسة هواية او قراءة كتاب او رياضة او او ...
الثانويات و يلي احيانا ترتقي الى مرتبة مضيعات الوقت متل المكالمات يلي بتضيع نص اليوم بدون اي فائدة و يلي ربعها اذا مو نصها بكون غيبة 🤭💬 متل ضياعة الوقت في تصفح الفيس يلي بلا طعمة ويلي ما بتعود عليك بالنفع و انما بس بتأهدر الوقت متل تنضيف البيت يلي بكون عمليا بياخد ساعة و بسبب ( الالتهاء او الوسوسة الزايدة ) بصير بياخد يوم كامل 🤕🤧🧗♀️
.
.
ثالثاً: بدك تكون صارم مع ذاتك !! 😑 كيف يعني ؟! يعني ما تعطي نفسك هواها و تقول يلا بس هالمسلسل او يلا بس هالمكالمة او يلا بس هالزيارة او او او .. اذا فشلت لاتلوم الوقت ولا الناس ولا الاولاد ولا العيلة .. لوم نفسك و بس .. اذا خصصت ساعة قراءة يوميا و ما التزمت فيها هي مشكلة من عندك لهيك نصيحتي الكم اتباع نظرية التدرج بالوقت : لا تبلشوا بأهداف عالية بتنظيم الوقت حتى ما يجيكم احباط وقت ما تنفذوها.
بلشوا بطريقة بسيطة ( صفحتين يوميا قراءة قبل النوم ) و بس تلتزم فيها و تحس انك صرت مرتاح وانت عم تقرأ وفيك تأنجز أكتر .. بتزيد الصفحات
.
.
رابعاً : لا تتخلى عن وقتك الخاص باليوم مهما حصل !!
Me Time
لو كنتي ام .. علمي أولادك على احترام وقتك الخاص و مساحتك الخاصة .. دربيهم على هالامر قدر الاستطاعة لو تعبتي بالبداية رح تلاقي نتيجة مع الوقت
.
.
خامساً و أخيراً : استعن بالله !! ❤
يعني انت اعمل يلي عليك و حاول و جاهد و نظم بالطريقة يلي بتناسبك و اترك الباقي على رب العالمين و ادع دايما بصلاتك " اللهم بارك لي في وقتي " ..
صدقوني مافي خلطة سحرية لتنظيم الوقت ولا في أي ميزات بيستخدموها الناس الناجحين يلي عرفانين يقسموا اوقاتهم .. هنن فقط حاولوا و اجتهدوا و مشوا وراء شغفهم و حلمهم ليتحقق .. انتوا كمان فيكم 🥰
احكولي نصيحة بتتبعوها لاستثمار وقتكم ؟! 👇🏻
تابعوني على الانستغرام :
كمان اذا حابين تشوفوا فيديوهات متنوعة عن حياتي فيكم تشتركوا بقناتي على اليوتيوب:
تعليقات
إرسال تعليق